موضوع اجتماعي ... الحاسة الثامنة

السلام عليكم ورحمة الله وبركاته

ما كاينش فينا اللي ما عمرو ما حلم يكون عندو شي قدرة خاصة و لا يكون مميز ..أو بطل خارق بحال داكشي ديال إيكس مان و لا بات مان ولا عبد الرحمان و لا بيض السمان أوزيد و زيد ..ولكن ديما فالروسوم أو الأفلام و أو حتى الحكايات كايقول ليك بأن البطولة و القدرة الخاصة ما كاتجبد غي الصداع على مولاها ..و مثلا فحلقة قالهوم سوبرمان تمنيت كون كنت بنادم عادي و ما فادتني الصحة فوالو غي القتال معا الأشرار أنا كنت كانقول بأن هاديك غي فلسفة خاوية و شكون كره يطير و لا يكون عندو شي قدرة خارقة

و لكن كتاشفت أن عندي تا آنا حاسة أخرى ..حيت كاين الحواس الخمس و الحاسة السادسة هيا منين كاتوقع شي حاجة خايبة لشي حد عزيز عليك كاتحس بيها .. لا هادي ما عنديش و الحاسة السابعة هي اللي كاتتوقع بيها الخطر بحال الزلازل و لا غادي يموت شي واحد و لا ..تا هادي ما عنديش ... هاديك عند القطوط و الكلاب أنا عندي الحاسة الثامنة ألا وهي العياقة لا ماشي ديك العياقة اللي تخليك تبقى تبومبا على بنادم و لا تبقى بالسوايع حدا المراية تقاد فالتشاوك و لا تدير الحلقات بحال داكشي ديال الدريات و لا تدير الوشام و تطيح السروال و ..لا اسيدي انا عايق يعني فهيم ماشي كانفهمها طايرة ..كانفهمها قبل ما تطير. ..

و باش ما نهدروش فالخوى نعطيكوم أمثلة تثبت ان هاد القدرة الفريدة كانت عندي من صغري.

مثلا انا فاش الواليدة كاتقولي كول الخضرة راها مزيانا ..كانفهم واش فعلا كاتعني داكشي و لا غير باغياني ناكل باش ما تخسرش الماكلة و تتلاح عليها كانتعكس و كانتعنتت و كايكون مصيري أنني كاناكلها بالعصا.

و فاش كايقولي الواليد سير جيب شي حاجة كانعيق واش نيت محتاجها و لا باغي يسوسني باش يهدر معا ماما فشي موضوع و كانبقى مخبي حتى كايحصلني و كايبدا عليا بالتصرفيق حيت كانتجسس.

و عاوتاني من كايقولي الواليد نوض راك كترتي من الكونيكسيون طل على دوك الكتوبة راك شي نهار اتحل شي واحد تلقى فيه شي سراق الزيت ..كانعيق بيه باغي يجري عليا باش يجلس هوا إيوا كانبدا نتنخصص تا كاينوضني و يفيقني بشي تقرفيدة و كاننوض نتلوى... هههههههه

ومنين كايقولولي سير تحسن راه كبراتلك الغوفالة وليتي بحال شي متشرد كانعيق بأنه ماشي المشكلة فالشعر ولكن الضياف جايين وكانقولهوم اسيدي عاجبني شعري و طبعا كيما كاتتوقعو كاتتسالا القصة بطاخ بوووغ هااك للوجه...

و ناري فاش كايوصلو الضياف و كانبداو ناكلو ..معا خوكوم جويعة ما كانعقل على حد كانخشي وجهي فالطبسيل و نبدا ..كايتبسم الوليد و كايقولي كول بشوية آولدي لعزيز كانفهم بأنه فنفسو كايقولي غي بلاتي عليك شوهتينا الله يشوهك غي يمشيو الضياف بحالهم أونديرلك السلخة ديال الحوالا و كا نبقا مخلوع تا كاتجي الدقة و ما كانستافد والو من هاد العياقة ديالي...

و باش ما تقولوش هادشي كايوقع غير فالدار راه ..فالطريق كايقولي شي واحد السلام كانفهمو راه فنفسو كايقول تفووو علامن صبحت و كانبدا نعاير فيه و كانبان أنا اللي غالط حيت هو ما دارلي والو...

فالمدراسة كانجيـو نشوفو النقاط كانلقى واحد قراي كايطير جاب نقطة خايبة كانستعمل الفهامة ديالي و كانقولو راه غي حيت ما كاديرش عند هاداك الاستاد مراجاعة كايدير ليك اللعيبة فالجعيبة ..كايسمعني الاستاد كايطرطقلي واحد الصفر هانية غــادي نعوض فمادة خرى كانشوفو النقاط كانلقا صاحبي نيت القراي المجتهد جايب نقطة عاوتاني خايبة كانعاود نستعمل الفهامة كانقولو راه غي ما بغاكش تفوت ولدو المكلخ كايسمعني كايكسلني تا هوا بشي تمرميقا كاندوزو للثالث كايجيب نيت صاحبي نقطة خايبا و كايقولي بللي هوا ولا مكلخ... طبعا أنا عندي القدرة الخاصة كانقولو راه هاد الاستاد ما كايشرحش مزيان ما تخافوش ما سمعنيش و لكن نيت نقطتي عندو ما فيها ما يتنقص.. 0 لاصق فخوه...

وهكدا و بلا ما نكتر عليكم كبرات معايا هاد القدرة ووليت كانفهم الواليدة فاش كاتقولي راه بغت نشوفك تزوجتي قبل ما نموت بأنها كاتقصد واش ما بغيتيش تتجوج و تهنينا من مصروفك .. أوفاش كايقولي خويا عافاك سلفني شي فليسات دابا نردهم ليك كانعيق بللي باغي يدير ليا نوض نوض و لا نوض على سلامتك و لا نوض باباك جا ..إلى غير ذلك و ما كانسلفوش و كايتاهموني بالبخل و الإخوة ديال آخر الزمان حيت ما عايقينش بيه بحالي و كانصدق أنا الخايب..

و هكذا كتاشفت أن قدرتي خايبة بحالي و مافيها نفع قالك --العياقة-- وفعلا تيقت بأن القدرة المميزة كاتخرج على مولاها سبحان الله ما عمري عقت بشي حاجة و لا فهمتها و كانت زوينة لذلك قررت ندير كيما دار سبيدر مان و لاح كسوتو فالبحر نتخلا تا آنا على هاد الزفت نغصات عليا العيشة مللي تزاديت بحال داك الستون ديال توم و جيري كانو كايخليوني نتفرج فيه و فاش ولفت عليه و حفضتلو الوقت ما خلاونيش نتفرج قالك ما قالك لواه الروسوم خايبين وأنا خصني نشوف شي برنامج ثقافي باش نستافد و لكن مللي أنا عايق.. فهمت بأن وقتو جا معا مسلسل مصري متابعاه اختي كان كايجي فداك الوقت يعني ماشي المهم الاستفادة ولكن المهم المسلسل ولكن هانيا بعدا كان مصري يعني ثقافتهم بحال ديالنا و كايعالجو مشاكل تقدر توقع ماشي بحال دابا المكسيكي و التركي وأين أبي وأين أمي وأين سبرديلتي.. كاتلقا ديما ما عندهوم ما يدار غي الحب و اللا يقلبو شكون أب هادا و شكون خال عم هادا ..المهم هادا موضوع نتعمقو فيه فشي ساعة أخرى ..و دابا آخر عياقة غادي نعيق بيها هي أنني طولت عليكم وغادي نحبس هنا.

مع تحياتي

» موضوع حول الرشوة (1)
» حذف موضوع عزيز
» معالجة موضوع انشائي